Marítima

O encontro analizou a revisión da Política Pesqueira Común, a viabilidade das empresas, a innovación tecnolóxica e o relevo xeracional, e reivindicou unha maior unidade para defender os intereses da pesca

As XXX Xornadas Técnicas de Difusión do Sector Pesqueiro de Celeiro pecháronse cunha reivindicación clara: Europa necesita unha política pesqueira máis próxima á realidade das empresas e dos profesionais do mar, capaz de compatibilizar a protección dos recursos coa viabilidade económica e social da actividade. Tras tres días de debates, representantes institucionais, organizacións do sector, científicos e profesionais coincidiron na necesidade de pasar das declaracións de intencións a decisións concretas que garantan a continuidade da pesca.

Un dos principais asuntos abordados foi o futuro da Política Pesqueira Común (PPC) e as expectativas abertas pola Visión 2040 da Comisión Europea. As intervencións de Javier Garat, secretario xeral de Cepesca, e Iván López, representante da industria pesqueira e dos organismos internacionais do sector, puxeron de manifesto as carencias que, ao seu xuízo, presenta o actual enfoque comunitario e a necesidade de introducir cambios estruturais.

Entre as demandas trasladadas figuraron a revisión da obriga de desembarque, a eliminación de trabas que limitan a capacidade operativa dos buques, a simplificación das normas e a dispoñibilidade de instrumentos financeiros suficientes. Tamén se expresou preocupación polos acordos pesqueiros con terceiros países e polas condicións de competencia da frota comunitaria fronte a outras potencias. O sector reclama así un marco que achegue estabilidade, seguridade xurídica e perspectivas de futuro, en lugar de engadir dificultades ao desenvolvemento da actividade.

A dimensión internacional e a gobernanza pesqueira ocuparon igualmente parte do programa, con achegas como a de Juan Martín, de OPROMAR, e reflexións sobre a xestión e o papel das institucións europeas e estatais. Pola súa banda, Isabel Artime, secretaria xeral de Pesca do Ministerio de Agricultura, Pesca e Alimentación, abordou os desafíos da actividade desde a perspectiva da Administración central.

A ciencia e a innovación constituíron outro dos grandes eixes das xornadas. Rogelio Pozo, director xeral de AZTI, e Enrique Moreno, coordinador de CEI·MAR, destacaron a importancia da investigación aplicada e da colaboración entre os ámbitos científico e produtivo para mellorar a xestión dos ecosistemas mariños e avanzar cara a modelos máis eficientes.

A dixitalización, a intelixencia artificial, a mellora da selectividade, a eficiencia enerxética e a descarbonización da frota forman parte dos retos que deberá afrontar o sector. Con todo, os debates tamén deixaron claro que esta transformación require investimentos e que non pode desvincularse da capacidade económica das empresas e das distintas modalidades de frota.

Outro dos desafíos destacados foi a competencia polo espazo marítimo, especialmente polo desenvolvemento da enerxía eólica mariña. Neste ámbito, expúxose a necesidade de compatibilizar os novos usos do mar coa conservación dos caladoiros e cos intereses das comunidades pesqueiras. A comercialización, a evolución dos mercados, o consumo de produtos pesqueiros e a posta en valor do peixe salvaxe completaron unha programación que abordou a cadea marítimo-pesqueira no seu conxunto.

O relevo xeracional tamén estivo presente nas reflexións. A dificultade para atraer xente nova, mellorar o atractivo da profesión e asegurar a continuidade das empresas e das localidades costeiras evidencia que o futuro da pesca non depende unicamente das posibilidades de captura. Tamén precisa ofrecer oportunidades laborais e condicións dignas a quen queira incorporarse á actividade.

A conclusión compartida foi que a sustentabilidade ambiental debe avanzar xunto coa económica e social. A protección dos recursos mariños, a competitividade das empresas e a cohesión territorial non poden entenderse como obxectivos separados. As comunidades costeiras necesitan unha actividade pesqueira viable para manter o seu tecido económico e social.

Neste sentido, unha das principais mensaxes desta edición foi a chamada á unidade sectorial e a reforzar a interlocución coas administracións. As diferenzas entre modalidades de pesca e as distintas realidades da frota non deberían impedir a defensa de reivindicacións comúns, como unha regulación proporcionada, financiamento suficiente, estabilidade normativa e recoñecemento da importancia estratéxica da actividade.

A clausura das xornadas incluíu tamén unha homenaxe ao Centro Tecnolóxico do Mar (CETMAR) polo seu 25 aniversario, na que se puxo en valor a súa achega á investigación, á innovación e á cooperación co sector marítimo-pesqueiro.

Trinta edicións despois, as xornadas de Celeiro consolidan o seu papel como foro de análise e defensa da pesca, mantendo o diálogo entre os diferentes elos da cadea. O encontro volveu deixar unha mensaxe dirixida ás institucións europeas: a sustentabilidade dos océanos non pode construírse debilitando a capacidade pesqueira propia. Para garantir o futuro do sector fan falta unha frota competitiva, empresas viables, profesionais con oportunidades e unha política que teña en conta a realidade de quen vive do mar.