Catro participantes mariñáns afrontarán un reto solidario polo deserto de Marrocos no Chatarras Raid
A paixón polo motor e a solidariedade volverán unirse no Chatarras Raid, unha aventura automobilística na que participarán catro veciños da Mariña e que os levará a percorrer arredor de 1.600 quilómetros polo deserto de Marrocos. A alcaldesa de Cervo, Dolores García Caramés, e o concelleiro Adrián Arias recibiron este mércores os integrantes da expedición no Concello, que colabora coa iniciativa.
O equipo está formado por José Ángel Sánchez, veciño de Cervo, Aitor Gómez e as súas parellas, María Inés Vázquez e Lara Rodríguez. A aventura comezará este xoves 29 de outubro coa viaxe cara a Tánxer, punto de partida do percorrido, que rematará en Marrakech o próximo 6 de novembro.
Dous vehículos antigos para percorrer 1.600 quilómetros
Os participantes afrontarán o reto a bordo de dous coches antigos: un Volkswagen New Beetle de 1999, que xa os acompañou na edición de 2024, e un Passat de 23 anos. A proba reúne arredor de 250 vehículos e pon a proba a resistencia dos automóbiles, a orientación dos equipos e a súa capacidade para superar as dificultades do terreo.
Unha aventura con carácter solidario
O Chatarras Raid destaca tamén pola súa vertente humanitaria. Os equipos participantes colaboran coa entrega de material e produtos de primeira necesidade destinados a iniciativas solidarias.
Neste sentido, o Concello de Cervo entregou aos catro participantes alimentos non perecedoiros para contribuír a esta acción durante o percorrido por Marrocos.
Desde o Concello desexáronlles sorte nesta nova aventura, na que levarán o nome de Cervo e da Mariña, e agradeceron o seu compromiso cunha iniciativa que combina a afección polo motor coa solidariedade.