Catro mariñáns completan o Chatarras Raid polo deserto de Marrocos
Os catro participantes mariñáns do Chatarras Raid, José Ángel Sánchez, Aitor Gómez, María Inés Vázquez e Lara Rodríguez, completaron o percorrido polo deserto de Marrocos e puxeron así o broche final a unha experiencia que mesturou aventura, compañeirismo e solidariedade. A expedición, que comezou o pasado 29 de outubro en dirección a Tánxer, tiña previsto rematar en Marrakech o 6 de novembro, despois de percorrer arredor de 1.600 quilómetros polo territorio marroquí.
O equipo tivo que superar condicións meteorolóxicas adversas nalgúns momentos da ruta, pero conseguiu completar o desafío a bordo dos dous vehículos antigos cos que participou na proba: un Volkswagen New Beetle de 1999, que xa empregaran na edición de 2024, e un Passat de 23 anos.
A aventura reuniu arredor de 250 vehículos e puxo a proba a resistencia dos automóbiles, a orientación dos participantes e a súa capacidade para afrontar as dificultades do terreo. Porén, o reto foi máis alá da vertente automobilística, xa que incorporou tamén unha importante dimensión humanitaria.
Os catro mariñáns cumpriron co obxectivo solidario da iniciativa coa entrega de alimentos non perecedoiros achegados polo Concello de Cervo. A acción forma parte das colaboracións que os equipos participantes realizan durante o percorrido, mediante a distribución de material e produtos de primeira necesidade destinados ás comunidades locais.
Antes da saída, a alcaldesa de Cervo, Dolores García Caramés, e o concelleiro Adrián Arias recibiran os integrantes da expedición na casa consistorial, nun encontro no que o municipio lles fixo entrega dos alimentos e lles trasladou os seus mellores desexos para a aventura.
Unha vez completado o percorrido, o Concello felicitou a José Ángel, Aitor, María Inés e Lara polo esforzo e a capacidade de superación demostrados, así como polo seu compromiso solidario. A institución municipal destacou tamén que os catro levaron o nome de Cervo e da Mariña ata Marrocos, nunha experiencia na que a afección polo motor estivo acompañada pola vontade de colaborar con outras comunidades.