Catorce locais de Burela súmanse a unha nova edición do Tapeo Bonito
A hostalaría de Burela volverá converter o bonito do norte no protagonista das súas cociñas coa celebración dunha nova edición do Tapeo Bonito, unha cita que servirá de antesala á Feira do Bonito e que reunirá a catorce establecementos da vila entre este xoves e o sábado.
Durante tres días, bares, cafeterías e restaurantes participantes prepararán distintas propostas gastronómicas nas que o bonito do norte será o ingrediente principal, ofrecendo aos clientes diferentes maneiras de degustar un dos produtos máis representativos da economía e da identidade mariñeira de Burela.
A iniciativa foi presentada este martes pola concelleira de Festas e Festexos, Patricia Eijo, xunto á presidenta da Sociedade Cultural Recreativa Ledicia, Rocío Riveira. Durante o acto, Eijo destacou a implicación do sector hostaleiro na promoción deste produto: “O Tapeo Bonito permite seguir poñendo en valor o bonito do norte da man da hostalaría local, que cada ano se implica con propostas moi variadas para ofrecer ao público diferentes formas de degustar este produto”.
Nesta edición participarán os establecementos A Chave das Noces, A Lonxa, A’Mares, Arenal, Brétema, Contraste, La Cocina de la Yaya, L'Urbana, Luzern, Nordestina, Os Remos, Salitre, Sargo e Vistalegre.
A Feira do Bonito celébrase en Burela desde 1983 e está recoñecida como Festa de Interese Turístico Nacional, converténdose nun dos principais escaparates gastronómicos do municipio.
O Tapeo Bonito xurdiu no ano 2021, cando a pandemia obrigou a suspender a que ía ser a XXXVII edición da feira. Co propósito de manter viva esa celebración, promoveuse unha proposta na que os establecementos hostaleiros da vila elaboraron pratos e tapas con bonito do norte.
A boa acollida daquela primeira experiencia levou á súa continuidade e, desde entón, o Tapeo Bonito consolidouse como unha actividade previa á Feira do Bonito, reforzando a promoción gastronómica deste produto e a participación da hostalaría local.