Carro Tarabelo amplía o curso de costura básica en A Pontenova cun novo grupo
A asociación Carro Tarabelo de A Pontenova ampliará o seu curso de costura básica coa creación dun novo grupo debido á elevada demanda rexistrada. A segunda quenda desenvolverase os xoves, de 16:30 a 19:00 horas, e manterá o mesmo programa e os mesmos obxectivos que o grupo dos mércores, que xa se atopa completo.
A actividade desenvolverase entre o 14 de outubro e o 10 de decembro e está pensada para persoas que queiran iniciarse na costura e adquirir coñecementos básicos para realizar diferentes traballos.
O curso permitirá aprender cuestións fundamentais como manexar a máquina de coser, facer dobras, poñer biés, realizar baixos e colocar cremalleiras. Os coñecementos adquiridos aplicaranse tamén na elaboración de dous proxectos prácticos: unha bolsa tipo tote con forro e asas e unha funda de coxín con cremalleira.
Para desenvolver estes traballos será necesario dispoñer de diferentes materiais. Entre eles figuran un metro de loneta, un metro de algodón para o forro, 50 centímetros de tea para o coxín e unha cremalleira de 50 centímetros.
O novo grupo dos xoves ocupará así as prazas dispoñibles ante o interese suscitado pola proposta. A organización anima as persoas interesadas en iniciarse na costura a aproveitar esta nova oportunidade para aprender as primeiras técnicas e adquirir autonomía no manexo da máquina e na confección de pezas sinxelas.
As persoas que precisen máis información poden contactar con Dolores García, no teléfono 697 221 869, mentres que para realizar as inscricións está dispoñible María José, no 661 909 152.
⇒REPORTAXE