Burela vive unha fin de semana de surf, deporte feminino e natureza na Marosa
A praia da Marosa converteuse este sábado no punto de encontro de deportistas, familias e afeccionados coa celebración da primeira xornada do Iberdrola Surfing Day Burela 2026, unha cita que combinou a práctica do surf con música, longskate, actividades ambientais e propostas de divulgación.
A presidenta da Deputación de Lugo e alcaldesa de Burela, Carmela López, achegouse ao evento, que busca vincular o deporte coa participación cidadá, a igualdade, o coñecemento do medio mariño e a promoción da costa da Mariña.
Un dos principais eixos da primeira xornada foi a visibilización das mulleres no deporte. Melania Suárez, campioa da Liga Prol 2025, e María Martín-Granizo, campioa do mundo de para surfing, participaron nunha master class na que compartiron coñecementos e experiencias coas persoas inscritas.
Posteriormente, ambas trasladaron a conversa fóra da auga cun encontro sobre experiencia e liderado feminino. Esta temática tivo continuidade no espazo Muller e Deporte, no que se abordaron cuestións relacionadas coa igualdade, o liderado e as oportunidades que ofrecen o deporte e o turismo activo.
A programación quixo mostrar ademais referentes femininos máis alá da propia competición, poñendo o foco tamén nas mulleres que desenvolven o seu labor en ámbitos como os equipos técnicos, a formación, a xestión ou as institucións.
A iniciación ao surf foi outro dos atractivos do día. O Burela Surf Club desenvolveu bautismos para aquelas persoas que querían ter un primeiro contacto cunha táboa e co océano. Pola súa banda, Aloha Escola e Skate Park encargouse dos obradoiros de longskate.
O medio mariño, protagonista
A relación entre deporte e natureza ocupou tamén unha parte destacada da programación. Mare Masma, Multiaventura e Medio desenvolveu un obradoiro sobre a fauna e a flora do intermareal rochoso, ao que se sumou posteriormente unha actividade centrada na biodiversidade e na conservación mariña.
A divulgación completouse coa proxección do documental 'Baixo as augas da Mariña-Ortegal', achegando aos participantes ao patrimonio natural que se agocha baixo as augas desta parte da costa galega.
Xa ao final da tarde, a música tomou o relevo coa sesión de DJ Grande Osso, pechando unha xornada que buscou ampliar o evento máis alá da práctica estritamente deportiva.
A organización destacou tamén a capacidade deste tipo de encontros para atraer visitantes, dar a coñecer Burela e A Mariña e xerar actividade arredor do tecido local. O evento conta coa implicación do Concello de Burela e da Deputación de Lugo, así como coa colaboración do Burela Surf Club.
O longboard toma o relevo este domingo
A actividade continuará este domingo, 13 de setembro, cunha segunda xornada na que a competición adquirirá maior protagonismo. A primeira chamada aos participantes está prevista para as 9.00 horas, cando se comprobarán tamén as condicións do mar.
A competición oficial arrancará, segundo a previsión, ás 9.30 horas. A Marosa acollerá a terceira proba da Liga Nacional FESurfing de Longboard 2026, ademais do Campionato Galego de Longboard.
A cita nacional incluirá as categorías Open, Sub18, Master e Grand Master, co desenvolvemento das diferentes eliminatorias ao longo da mañá e as finais durante a tarde.
A competición convivirá con novas propostas abertas ao público. O Burela Surf Club repetirá os bautismos de surf durante a mañá e a tarde e continuarán os obradoiros de longskate de Aloha Escola e Skate Park.
A previsión establece o remate das probas e a cerimonia de entrega de premios arredor das 16.00 horas, poñendo o broche a unha fin de semana na que A Marosa se converteu nun escaparate do surf e da súa relación co deporte feminino, o medio mariño e a vida local.
O Iberdrola Surfing Day Burela 2026 conta co apoio de Iberdrola, a Deputación de Lugo, o Concello de Burela e Loterías e Apostas do Estado, coa implicación do Burela Surf Club e a colaboración de EQ Love e Ocean & Earth.