Burela transforma a Praza do Concello para crear un novo espazo de lecer no centro
O Concello de Burela avanza na remodelación dun espazo da Praza do Concello co obxectivo de incorporalo á vida diaria da vila e convertelo nunha zona destinada ao descanso, ao encontro e ao lecer da cidadanía. Os traballos permitirán recuperar un punto céntrico que ata o momento tiña escaso uso.
A intervención aposta polo granito como material principal para o pavimento e contempla a creación dunha zona verde aberta á veciñanza. O proxecto inclúe tamén a instalación de tres árbores que proporcionarán sombra, así como mesas adaptadas tanto para persoas adultas como para nenos.
Unha das características da actuación será o aproveitamento dos recursos xa dispoñibles. Parte do mobiliario existente será reutilizado e integrado na nova configuración, complementándose con novos elementos para dotar o espazo de maior funcionalidade.
A alcaldesa de Burela, Carmela López, explica que a intención é que este punto deixe de ser simplemente unha zona de paso e se converta nun lugar no que a veciñanza poida permanecer, descansar ou aproveitar os espazos de sombra.
“Queremos que este espazo teña vida. Que non sexa simplemente unha zona pola que pasar, senón un sitio no que apeteza quedar”, sinala a rexedora.
Unha zona máis integrada na Praza do Concello
A nova distribución permitirá tamén abrir visualmente o espazo cara á Praza do Concello, favorecendo a súa integración nun dos puntos con maior actividade do centro urbano de Burela.
Desde o goberno municipal destacan que a actuación non require unha transformación de grandes dimensións para conseguir un cambio significativo no uso desta zona. “Tiñamos un espazo con moitas posibilidades e queremos devolverllo á xente”, apunta López.
As obras continúan estes días coa preparación das diferentes áreas que conformarán o novo espazo. Unha vez completada a intervención, Burela contará no centro da vila cunha nova zona verde e de estancia destinada ao uso cotián da veciñanza.
