Burela reforza a integración de menores migrantes a través da educación e o acompañamento
O Fogar San Aníbal Os Castros, situado en Burela, consolidouse nos últimos meses como un recurso de referencia para a atención de menores migrantes non acompañados en Galicia. O centro, concertado coa Xunta e xestionado polas Fillas do Divino Celo, acolle actualmente a 14 rapaces de entre 12 e 18 anos procedentes de distintos países africanos, ofrecéndolles apoio educativo, acompañamento social e un entorno estable para construír un novo proxecto de vida.
As instalacións atópanse nun inmoble cedido polo Concello de Burela, onde xa funcionaba unha vivenda destinada á emancipación de mozos maiores de idade. O fogar opera como unha unidade residencial na que os menores conviven durante todo o día baixo a supervisión dun equipo multidisciplinar formado por 14 profesionais e coordinado polo pedagogo Iván Penelo.
Dos 14 residentes actuais, once chegaron desde Canarias e tres desde Ceuta. Proceden de países como Gambia, Malí, Marrocos, Senegal e Mauritania, tras percorrer longas rutas migratorias marcadas en moitos casos por dificultades e experiencias especialmente complexas.
Desde a entidade xestora destacan a evolución experimentada polos mozos desde a súa chegada. O director da Obra Social das Fillas do Divino Celo, Jesús Iglesias, subliña que en apenas tres meses se apreciou un importante cambio na súa adaptación e expectativas de futuro. Neste sentido, agradeceu a colaboración dos centros educativos da comarca e o labor realizado para facilitar a súa incorporación ao sistema educativo.
Durante o último curso, os menores participaron en diferentes programas formativos en centros da Mariña. Entre eles figuran o IES Monte Castelo, o IES Perdouro, o IES Marqués de Sargadelos, o CPR Martínez Otero e o CPR Plurilingüe do Pilar. Neles cursaron estudos de educación secundaria, formación profesional e outras accións formativas orientadas á súa integración académica e laboral.
Un dos principais retos segue a ser a aprendizaxe lingüística. A pesar de que a maioría levaba máis dun ano en España antes da súa chegada a Galicia, moitos presentaban dificultades no dominio do castelán. Por iso, o fogar reforza diariamente a formación en castelán e galego mediante sesións de estudo acompañadas polos educadores.
Ademais, varios dos mozos compaxinan xa a súa formación coa actividade laboral. Oito deles, entre os que se atopan dous recentemente maiores de idade e outros seis de 17 anos, realizan traballos durante as fins de semana ou ao rematar a xornada lectiva, unha experiencia que lles permite avanzar cara á autonomía persoal.
Desde o centro tamén se pon en valor a resposta da veciñanza de Burela durante estes primeiros meses de funcionamento. Os responsables do fogar agradecen a acollida recibida e destacan a colaboración mostrada por numerosos veciños e entidades locais para favorecer a integración dos menores na comunidade.
Segundo sinalan desde as Fillas do Divino Celo, os rapaces demostraron unha notable capacidade de esforzo e adaptación. A entidade considera que a súa implicación nos estudos, na aprendizaxe dos idiomas e na procura de oportunidades laborais reflicte a vontade de construír un futuro estable e de contribuír activamente á sociedade que os acolle.