Burela estrea un servizo mensual para tramitar o DNI e o pasaporte sen saír do municipio
O Concello de Burela estreou este mércores 23 de setembro un novo servizo da unidade móbil da Policía Nacional que permitirá á veciñanza realizar no propio municipio os trámites relacionados coa expedición e renovación do DNI e do pasaporte.
A unidade desprazarase a Burela unha vez ao mes e atenderá arredor de 30 citas en cada xornada, co obxectivo de evitar desprazamentos e facilitar aos veciños a realización destas xestións administrativas.
As persoas interesadas deberán inscribirse previamente. Poderán facelo de maneira presencial na Casa do Concello, chamando ao teléfono 982 58 60 00 ou a través do correo electrónico dni@burela.org.
Para solicitar a cita será necesario facilitar nome e apelidos, número de DNI e un teléfono de contacto. Unha vez realizada a inscrición, o Concello porase en contacto con cada persoa para comunicarlle e confirmar o día e a hora na que será atendida pola unidade móbil.
Desde a administración local lembran tamén que o DNI pode renovarse desde seis meses antes da súa data de caducidade, polo que animan a ter en conta esta marxe á hora de solicitar unha das prazas dispoñibles.
A posta en marcha do servizo pretende achegar á cidadanía trámites que ata o momento obrigaban a desprazarse fóra do municipio. A alcaldesa, Carmela López, destacou que "a través deste novo servizo pretendemos que sexa cada vez máis doado para a nosa veciñanza realizar trámites tan necesarios como a expedición dun DNI ou pasaporte, facilitando un pouco máis a vida dos burelaos e burelás".
Deste xeito, Burela incorporará de maneira periódica a visita da unidade móbil da Policía Nacional, ampliando os servizos administrativos aos que a veciñanza pode acceder directamente na localidade.