Burela contará desde setembro cun punto para expedir e renovar o DNI sen saír do municipio
Os veciños e veciñas de Burela poderán realizar a partir do próximo mes de setembro os trámites de expedición e renovación do Documento Nacional de Identidade no propio municipio, grazas á posta en marcha dun novo servizo impulsado polo Concello en colaboración coa Policía Nacional.
A iniciativa nace coa finalidade de achegar esta xestión administrativa á cidadanía e evitar desprazamentos a outras localidades, unha medida especialmente pensada para facilitar o acceso ás persoas maiores, ás familias e a aqueles usuarios que teñen maiores dificultades para moverse.
A alcaldesa de Burela, Carmela López, promoveu a solicitude deste servizo ante a Policía Nacional de Lugo, dando resposta a unha demanda recorrente entre a poboación. O proxecto avanzou nos últimos días coa visita institucional do comisario xefe da Policía Nacional en Lugo, Luis Miguel Romera Pérez, e do subinspector José Luis Mourín González, que mantiveron un encontro de traballo para concretar os detalles da súa implantación.
O servizo funcionará mediante unha unidade móbil da Policía Nacional que se desprazará periodicamente ata Burela. O punto de atención instalarase na Praza do Concello e a previsión é que as primeiras citas poidan comezar a atenderse durante o mes de setembro.
Segundo a planificación prevista, habilitarase unha xornada mensual para a realización destes trámites, cunha capacidade aproximada para atender a unha trintena de persoas en cada sesión. Desta forma, os usuarios poderán renovar ou obter o seu documento de identidade sen necesidade de desprazarse a oficinas situadas noutras cidades.
A rexedora destacou a importancia desta iniciativa por considerar que contribúe a achegar os servizos públicos á veciñanza e a simplificar xestións habituais. Na súa opinión, eliminar desprazamentos innecesarios supón unha mellora directa na calidade de vida da cidadanía e favorece unha administración máis próxima e accesible.
O Concello xa abriu o prazo para solicitar cita previa. As persoas interesadas poden formalizar a petición enviando un correo electrónico a dni@burela.org ou contactando telefonicamente co consistorio no número 982 58 60 00. Para completar a reserva será preciso indicar o nome e apelidos, o número do DNI e un teléfono de contacto.
Desde a administración local lembran tamén que a renovación do documento pode realizarse ata seis meses antes da súa data de caducidade, polo que recomendan revisar con antelación a vixencia do DNI para evitar contratempos e aproveitar a chegada deste novo servizo ao municipio.