Bronce para O Cembedo no Campionato de España Senior de bádminton
O Club de Bádminton O Cembedo, con sede en Viveiro, deixou pegada no Campionato de España Sénior celebrado a pasada fin de semana en Leganés, unha cita que reuniu preto de 400 xogadores procedentes de todo o Estado.
O equipo mariñán estivo representado por tres deportistas: Marta Castro, Iván Suárez e Jorge Santamariña, que competiron nas categorías B2 e C2, asinando un bo papel en cada unha das súas modalidades.
O mellor resultado chegou na proba de dobres mixtos C2, onde Marta Castro e Jorge Santamariña conseguiron un meritorio terceiro posto e a correspondente medalla de bronce. A parella vivairense quedou ás portas da final tras enfrontarse na semifinal ao dúo formado por Michael Lorentzen e Wendy Weir, que acabou levándose o encontro.
Desde o club valoran moi positivamente esta participación, destacando a boa forma e a evolución dos seus xogadores. A vindeira parada para O Cembedo será o 17 de maio en Xixón, onde continuarán sumando experiencia e buscando novos éxitos nas pistas.