Barreiros acollerá un curso de verán para impulsar o emprendemento turístico na Mariña Lucense
A antiga escola de San Cosme, en Barreiros, converterase do 6 ao 9 de xullo nun espazo de aprendizaxe e intercambio de experiencias arredor do turismo e a creación de empresas. A Mancomunidade de Concellos da Mariña Lucense e a Universidade da Coruña organizan unha nova edición dos seus cursos de verán baixo o título Emprender no sector turístico na Mariña Lucense.
A iniciativa está dirixida tanto a estudantes universitarios como a profesionais, persoas emprendedoras e público interesado en adquirir coñecementos relacionados cun dos sectores estratéxicos da comarca. As sesións desenvolveranse en horario de tarde, entre as 16:00 e as 21:00 horas.
A presidenta da Mancomunidade, Rocío López, destacou que o programa foi deseñado para ofrecer ferramentas prácticas e competencias útiles a quen desexe poñer en marcha un proxecto empresarial vinculado ao turismo. Ao longo das xornadas abordaranse cuestións relacionadas coa análise da competencia, o deseño de modelos de negocio, a captación de clientes, a planificación financeira, a comercialización de produtos turísticos, a dixitalización, o comercio electrónico ou os aspectos fiscais que afectan ao emprendemento.
A dirección académica do curso estará a cargo de Antonio García Lorenzo, profesor da Facultade de Economía e Empresa da Universidade da Coruña e natural do Valadouro, mentres que a coordinación administrativa será responsabilidade de Tania Hermida, axente de desenvolvemento turístico da Mancomunidade.
O programa contará coa participación de profesionais e especialistas de distintos ámbitos. A primeira xornada centrarase na estratexia empresarial e no posicionamento competitivo, mentres que o segundo día estará dedicado á promoción e comercialización de destinos turísticos. A avaliación financeira protagonizará a terceira sesión e o curso concluirá cunha análise da fiscalidade aplicada aos proxectos emprendedores.
A matrícula ten un custo de 50 euros para o público xeral e profesional, aínda que existen tarifas reducidas de 30 euros para integrantes da comunidade universitaria da UDC, estudantes, persoas desempregadas e pensionistas. Ademais, reservaranse prazas gratuítas para alumnado bolseiro dos Cursos de Verán 2026 da universidade.
Outro dos atractivos da iniciativa é que a asistencia poderá ser recoñecida mediante créditos académicos nos estudos de grao, segundo a normativa e o plan de estudos de cada titulación.
A organización lembra que o prazo de inscrición permanecerá aberto ata o vindeiro 5 de xullo e que a oferta está limitada a 50 participantes, polo que recomenda formalizar a matrícula con antelación.