As Noites de Fútbol Praia de Cervo rematan con catro equipos campións nas distintas categorías
As Noites de Fútbol Praia de Cervo puxeron o punto e final a tres xornadas de competición nas que o deporte, o compañeirismo e o bo ambiente foron os protagonistas. O Concello felicitou a todos os equipos participantes polo seu esforzo e pola deportividade amosada ao longo do torneo.
Na categoría Sub-12, o primeiro posto foi para Xove Fútbol Praia, seguido por Viveiro Celtic e Sanci FC, que completaron o podio. En Sub-15, o equipo Cachupa proclamouse campión, mentres que Wachines rematou na segunda posición e Encueradores ocupou o terceiro posto. Na competición Sub-17, Hamburguesas FC acadou o primeiro posto, por diante de EnlaDepor e Wachines. Na categoría Sénior, o triunfo foi para Hamburguesas, seguido de La Org como subcampión e Motototo na terceira posición.
A entrega de medallas correu a cargo da alcaldesa de Cervo, Dolores García Caramés, quen felicitou aos equipos premiados e trasladou o seu agradecemento a todas as persoas participantes, ás familias, ao público asistente e aos colaboradores que contribuíron ao desenvolvemento da actividade.
O Concello de Cervo avanzou ademais que a programación deportiva continuará a partir da semana do 20 de xullo coa celebración dun torneo de fútbol 3x3.