A XVII Run Foz Run volverá converter Foz nun escenario deportivo o vindeiro 2 de agosto
Foz volverá poñer en valor o deporte popular coa celebración da XVII Carreira Popular Run Foz Run, unha das citas deportivas máis agardadas do verán no municipio, que terá lugar o vindeiro domingo 2 de agosto con saída e chegada no Paseo da Ribeira, fronte ao CENIMA.
A xornada dará comezo ás 10:00 horas e contará con diferentes percorridos adaptados ás idades e categorías dos participantes. Así, os máis pequenos poderán participar nun circuíto de 200 metros para a categoría Pícaros, mentres que os benxamíns percorrerán 800 metros, os alevíns 1.000 metros e os infantís e cadetes completarán un trazado de 1.600 metros.
A proba absoluta terá un percorrido de 7 quilómetros polas rúas de Foz e pola contorna do paseo da ría, nun circuíto mixto con saída e meta no Paseo da Ribeira. Ademais, tamén se celebrará unha andaina de 9 quilómetros para aquelas persoas que prefiran participar nunha modalidade non competitiva.
O programa deportivo completarase o día anterior, o sábado 1 de agosto, cunha andaina solidaria ás 20:05 horas e coa celebración do Día da Bicicleta, cun percorrido de 12 quilómetros que terá a saída ás 20:00 horas.
A carreira está organizada polo Concello de Foz e Run Foz Run, coa colaboración do Club de Atletismo Ría de Foz, e contará coa supervisión do persoal voluntario da organización e da Policía Local para garantir o correcto desenvolvemento da actividade.
500 prazas para a carreira absoluta
A organización establece un límite máximo de participación de 500 corredores na categoría absoluta, ademais de 100 prazas para cada unha das categorías inferiores: Pícaros, Benxamín, Alevín, Infantil e Cadete.
As inscricións poderán realizarse de maneira telemática desde o 1 de xullo ata o 30 de xullo ás 23:59 horas. O prezo variará segundo o prazo no que se formalice a inscrición: será de 7 euros para a carreira absoluta e a andaina entre o 1 e o 12 de xullo; de 10 euros entre o 13 e o 26 de xullo; e de 14 euros no último tramo, do 27 ao 30 de xullo. Nas categorías inferiores a inscrición será gratuíta salvo no último período, no que terá un custo de 2 euros.
No caso do Día da Bicicleta, a participación será gratuíta e as inscricións poderán realizarse na Casa da Xuventude de Foz ata o xoves 30 de xullo de 2026.
O sistema de cronometraxe da carreira absoluta realizarase mediante chip e as clasificacións oficiais publicaranse posteriormente nas páxinas web da organización e na plataforma de resultados correspondente.
A organización lembra que a inscrición é persoal e intransferible e que os participantes deberán aceptar o regulamento da proba, declarando atoparse nun estado de saúde adecuado para participar e asumindo as condicións establecidas pola organización.
Con esta nova edición, a Run Foz Run volve consolidarse como unha cita deportiva aberta a corredores de todas as idades, combinando competición, participación popular e actividades complementarias para converter a fin de semana nunha celebración do deporte en Foz.