A Pontenova prepárase para vivir unha nova fin de semana de velocidade coa súa Subida de Montaña
O motor volverá rugir en A Pontenova coa celebración da XIII Subida A Pontenova, unha das citas máis esperadas do calendario automobilístico galego que converterá a localidade nun punto de referencia para pilotos e afeccionados durante os días 26, 27 e 28 de xuño.
A proba, organizada pola Escudería A Pontenova, formarase parte do Campionato Galego de Montaña e desenvolverase no trazado da estrada LU-4803, entre A Pontenova e Augaxosa. O percorrido contará cunha lonxitude de 4,8 quilómetros, cun desnivel de 260 metros e unha pendente media do 5,40 %, características que o converten nun tramo esixente e atractivo para a competición.
A saída situarase a 110 metros de altitude, mentres que a chegada alcanzará os 370 metros, ofrecendo un trazado no que a técnica e a velocidade volverán ser protagonistas.
A competición reunirá vehículos de diferentes categorías, tanto carrozados como non carrozados, ademais das modalidades CM, carcross e regularidade. A cita será puntuable para distintas copas e campionatos autonómicos, incluída a Copa CM Memorial Paco Outeda, consolidada xa como unha das probas destacadas da fin de semana.
A organización agarda unha importante participación de pilotos chegados de diferentes puntos de Galicia, así como unha grande afluencia de público nas marxes do percorrido, onde cada ano se congregan centos de afeccionados ao deporte do motor.
Co paso das edicións, a Subida A Pontenova converteuse nun evento deportivo de referencia, non só pola calidade do trazado e o nivel competitivo, senón tamén polo ambiente que se vive durante toda a fin de semana na vila.