A Mariña abre unha nova convocatoria para incorporar empresas ao sistema de calidade turística
A Mancomunidade de Concellos da Mariña Lucense puxo en marcha unha nova fase de incorporación de empresas e servizos ao Sistema Integral de Calidade Turística Española en Destinos (SICTED), unha iniciativa que busca seguir fortalecendo a competitividade e a excelencia do sector turístico da comarca. O prazo para solicitar a adhesión permanecerá aberto ata o próximo 12 de xuño.
O programa está dirixido a negocios e entidades vinculadas á actividade turística e ofrece ás empresas participantes un itinerario gratuíto que inclúe accións formativas e asesoramento personalizado. O proceso contempla catro seminarios especializados e varias visitas técnicas aos establecementos adheridos para acompañalos na implantación dos estándares de calidade.
A primeira toma de contacto para as novas incorporacións terá lugar o 16 de xuño cunha sesión presencial, á que seguirá unha visita individualizada durante ese mesmo mes. Posteriormente, os traballos continuarán ao longo de setembro e outubro.
Na actualidade, a Mariña conta con 39 servizos integrados neste sistema, pertencentes a ámbitos como o aloxamento, a restauración, as oficinas de turismo, os museos, o turismo activo, o sector artesán e os servizos de guía. Nesta convocatoria, a Mancomunidade pretende ampliar a participación a novas actividades, incluíndo propostas de agroturismo, taxis turísticos e empresas dedicadas ao alugueiro de vehículos.
A presidenta da Mancomunidade, Rocío López, destacou que esta iniciativa forma parte da estratexia para consolidar un modelo turístico baseado na cooperación, na responsabilidade e na mellora continua dos servizos. O proxecto desenvólvese dentro do Plan de Sostibilidade Turística, financiado pola propia entidade supramunicipal, a Xunta de Galicia e a Secretaría de Estado de Turismo.
A edición deste ano chega ademais marcada pola renovación do propio programa SICTED, que tras un cuarto de século de traxectoria adapta os seus contidos aos novos desafíos do sector. O sistema incorpora agora unha visión máis ampla na que a calidade convive coa sostibilidade e coa innovación tecnolóxica, apoiándose en novas ferramentas dixitais e procesos máis áxiles.
Entre as novidades figura tamén a transformación do distintivo que reciben os participantes, que pasa a denominarse Compromiso de Turismo Responsable. Ademais, amplíase a súa vixencia ata os tres anos e actualízanse os criterios de avaliación para aliñalos coa Estratexia de Turismo España 2030 e cos Obxectivos de Desenvolvemento Sostible.