A Gladiator Kids converterá Ribadeo nun circuíto de aventuras para nenos o 25 de outubro
Ribadeo prepárase para unha mañá de deporte e diversión coa celebración dunha nova edición da Gladiator Kids, unha carreira de obstáculos dirixida á infancia que terá lugar o domingo 25 de outubro. A actividade comezará ás 12:00 horas diante da Casa do Concello e combinará exercicio físico, entretemento e solidariedade.
A proposta está aberta a nenos e nenas de entre 3 e 12 anos e terá un máximo de 250 participantes. Cada inscrición custa seis euros e a totalidade da recadación entregarase a Cruz Vermella Ribadeo, polo que a participación permitirá colaborar tamén cunha causa solidaria.
A organización deseñou dous percorridos en función da idade dos participantes. Os máis pequenos, de 3 a 5 anos, deberán completar unha distancia aproximada de 500 metros, mentres que os nenos e nenas de 6 a 12 anos afrontarán un trazado duns 900 metros. Os menores tamén poderán realizar a carreira acompañados dunha persoa adulta.
Para facilitar o desenvolvemento da xornada, as saídas organizaranse por quendas. A primeira será ás 12:00 horas e, a partir dese momento, comezarán novos grupos cada cinco minutos, cun máximo de 15 participantes por saída. Cada inscrito recibirá por correo electrónico, dous días antes da proba, a información sobre a quenda e o horario asignados.
A Gladiator Kids non terá carácter competitivo, polo que non haberá tempos oficiais nin clasificacións. A finalidade é que os participantes superen os obstáculos ao seu ritmo, practiquen actividade física e compartan unha experiencia lúdica nun ambiente pensado para o desfrute dos máis pequenos.