A Festa da Enfariñada de Trabada, recoñecida pola súa contribución á gastronomía lucense
A Festa da Enfariñada de Trabada vén de sumar un novo recoñecemento ao seu labor de conservación e divulgación da gastronomía tradicional. A celebración foi distinguida nos VII Premios á Excelencia do Turismo e a Gastronomía da provincia de Lugo co galardón "...E para comer, Lugo", dedicado á gastronomía lucense.
O premio pon o foco nunha cita que contribúe a recuperar, conservar e dar a coñecer a enfariñada, un dos pratos máis singulares da tradición culinaria de Trabada. A súa elaboración artesanal e o emprego de produtos de proximidade son algunhas das características dunha receita que a festa busca manter viva e transmitir ás novas xeracións.
Desde o Concello destacan que a Enfariñada representa moito máis que unha proposta gastronómica, ao estar vinculada tamén coa memoria, a tradición e a identidade local. A celebración converteuse así nun escaparate para reivindicar unha elaboración propia e, ao mesmo tempo, nun punto de encontro arredor do patrimonio culinario do municipio.
O goberno local fixo extensivo o recoñecemento ás persoas que participan e colaboran cada ano na organización e desenvolvemento da festa, considerando que a súa implicación permitiu consolidar e facer medrar a cita edición tras edición.
O Concello de Trabada agradeceu ao Consello Provincial de Turismo a concesión desta distinción, que deberá completar agora a súa tramitación coa aprobación por parte da Xunta de Goberno da Deputación de Lugo.
O galardón supón, deste xeito, un novo impulso para unha festa que utiliza a gastronomía como ferramenta para conservar a memoria colectiva e divulgar unha das elaboracións máis representativas de Trabada.