A Federación de Confrarías de Lugo recibirá 96.000 euros para fortalecer a súa actividade en 2026
A Consellería do Mar e a Federación Provincial de Confrarías de Pescadores de Lugo renovaron este martes a súa colaboración coa sinatura dun convenio dotado con 96.000 euros para apoiar o labor que desenvolve a entidade ao longo de 2026 en defensa do sector pesqueiro da provincia.
O acordo foi formalizado na sede da federación, en Burela, pola conselleira do Mar, Marta Villaverde, e o presidente da organización, Basilio Otero. A achega económica busca garantir tanto o funcionamento ordinario da entidade como a posta en marcha de actuacións destinadas a modernizar a súa estrutura e mellorar os servizos que presta aos profesionais do mar.
A maior parte do financiamento, un total de 80.000 euros, destinarase a sufragar os gastos derivados da actividade diaria da federación, permitindo manter os servizos de representación, asesoramento e coordinación que desenvolve en favor das confrarías lucenses.
Os 16.000 euros restantes empregaranse en actuacións de investimento orientadas á modernización da entidade. Entre elas figuran obras de acondicionamento e mellora do arquivo da sede, a renovación do equipamento informático e a organización do Congreso de Pesca Artesanal do Cantábrico Noroeste, un encontro no que representantes das federacións galegas e cantábricas abordarán os principais retos e necesidades da frota artesanal.
Segundo destacou a Consellería do Mar, este convenio forma parte da liña de colaboración estable que mantén coa Federación Provincial de Confrarías de Pescadores de Lugo para fortalecer a representación do sector e impulsar a súa competitividade.
Desde 2020, o apoio económico da Xunta á entidade supera xa os 520.000 euros, un investimento que, segundo o departamento autonómico, contribúe a reforzar a defensa dos intereses dos pescadores e mariscadores da provincia e a favorecer a modernización da actividade pesqueira.