A Enfariñada regresará a Trabada con sabor tradicional e novas propostas gastronómicas
A VII Festa da Enfariñada xa quenta motores en Trabada cunha edición que chegará cargada de novidades sen renunciar ao espírito tradicional que consolidou esta cita no calendario festivo e gastronómico da comarca. A celebración terá lugar o domingo 3 de maio, desde as 12.00 horas, na explanada situada fronte ao parque da rúa San Roque.
Un dos grandes atractivos da xornada volverá ser a elaboración en directo da enfariñada, na que participarán máis de 40 veciños e veciñas. O evento converterase así nun escaparate da tradición culinaria local, pero tamén nun espazo de convivencia e participación arredor dun prato moi vencellado á identidade do municipio.
Entre as novidades desta edición figura a incorporación dunha enfariñada con bonito de Burela, unha proposta coa que a festa amplía a súa oferta sen perder de vista o produto de proximidade. Ademais, haberá opcións sen gluten, un paso máis para facer a cita máis aberta e accesible a todos os públicos.
A programación incluirá tamén o regreso das fiolleiras de Muimenta, un mercado de produtos artesanais e un apartado musical que acompañará a celebración ao longo do día. Sobre o escenario actuarán Mestura de Nete, Grupo Lume e a Orquestra Marbella, completando unha proposta que mestura gastronomía, tradición e festa.
O alcalde de Trabada, Rubén García Freije, salientou que esta celebración representa unha combinación de tradición, participación e convivencia, tres elementos que explican o crecemento dunha cita que gaña peso ano tras ano. Co cartel xa presentado, o municipio prepárase para vivir unha nova edición dunha festa que busca seguir sumando público e reforzando o valor das súas raíces.