A diversidade entra nas aulas co proxecto de Guillem Veiga Iglesias
A Asociación Guillem Veiga Iglesias (GVI) levou durante o mes de outubro o proxecto CÓDIGO AUGAS DIVERSAS a diferentes centros educativos, onde traballou con estudantes de 4º da ESO e 1º de Formación Profesional Básica arredor da diversidade, a inclusión e a accesibilidade.
A iniciativa toma como punto de partida os distintos oficios vinculados ao sector marítimo, así como os coñecementos e as particularidades de cada profesión. Para achegar esta realidade á mocidade, en cada sesión participou tamén un profesional do mar convidado, que compartiu a súa experiencia e explicou as características do seu traballo. A partir destes testemuños, o alumnado puido reflexionar sobre as diferentes capacidades e formas de desenvolverse tanto no ámbito mariñeiro como na sociedade.
A proposta combina aprendizaxe e participación mediante un circuíto gamificado no que os rapaces e rapazas, distribuídos en pequenos equipos, deben superar distintos desafíos colaborando entre si para conseguir o seu propio CÓDIGO AUGAS DIVERSAS. As probas inclúen xogos, ferramentas tecnolóxicas e situacións prácticas que permiten experimentar outras maneiras de percibir, comunicarse e desprazarse.
Entre os retos figura realizar un percorrido en cadeira de rodas para identificar barreiras que dificultan a mobilidade. Tamén se propoñen exercicios nos que os participantes deben empregar sistemas alternativos de comunicación para transmitir e interpretar mensaxes.
Estas experiencias buscan que os estudantes comprendan as dificultades ás que se enfrontan outras persoas e identifiquen como pequenas modificacións nos espazos, nos sistemas de comunicación ou na presentación da información poden favorecer que todo o mundo participe en igualdade de condicións.
O proxecto pretende, ademais, transmitir unha visión positiva da diversidade, entendida como un valor que enriquece a sociedade. A asociación destaca que cada persoa ten características e formas propias de facer as cousas e que o traballo conxunto permite compartir experiencias, aprender dos demais e recoñecer o que cada integrante achega ao grupo.
Desde a Asociación Guillem Veiga Iglesias agradeceron a colaboración dos centros educativos e a súa disposición para acoller a actividade. Tamén puxeron en valor a implicación dos mozos e mozas participantes no desenvolvemento das diferentes propostas.
CÓDIGO AUGAS DIVERSAS conta co apoio do Fondo Europeo Marítimo, de Pesca e de Acuicultura (FEMPA), a través da Consellería do Mar da Xunta de Galicia e do GALP A Mariña-Ortegal.