A Deputación financiará a mellora do campo de Vilela para crear un novo espazo multiusos en Ribadeo
A Vicepresidencia da Deputación de Lugo destinará 27.000 euros á mellora da área recreativa do campo de Vilela, en Ribadeo, cun proxecto pensado para ampliar as posibilidades de uso deste espazo veciñal e reforzar a súa funcionalidade para actividades sociais e culturais.
A actuación contempla a transformación da actual explanada de zahorra nunha pista multiusos, que contará cun novo pavimento de formigón desactivado. O obxectivo é que a veciñanza dispoña dun lugar máis acondicionado e seguro para celebrar encontros, eventos culturais, actividades lúdicas e outras iniciativas comunitarias ao aire libre.
O proxecto inclúe tamén cambios na circulación da zona para evitar o paso de vehículos polo espazo recreativo. Para iso habilitarase un novo acceso ás vivendas próximas, mellorando tanto a seguridade como a comodidade das persoas usuarias do recinto.
O deputado de Rural, Daniel García, explicou que esta intervención responde ás peticións trasladadas pola propia veciñanza e destacou a importancia de contar con espazos públicos adecuados nas zonas rurais. Segundo indicou, este tipo de actuacións contribúen a favorecer a convivencia, a participación social e a dinamización cultural nos núcleos do rural.
O convenio de colaboración entre a área de Rural da Deputación e o Concello de Ribadeo foi aprobado na última Xunta de Goberno provincial, paso que permitirá poñer en marcha esta mellora nos vindeiros meses.
Desde a institución provincial sinalan que o proxecto busca ofrecer un espazo máis versátil e adaptado ás necesidades actuais da parroquia, reforzando o uso comunitario dunha zona que serve habitualmente como punto de encontro para a veciñanza.