A Deputación desbloquea a recta final do Centro de Atención a Maiores da Pontenova
A Deputación de Lugo deu un novo impulso á construción do Centro de Atención a Maiores (CAM) da Pontenova ao aprobar na Xunta de Goberno un conxunto de medidas destinadas a desbloquear definitivamente un proxecto que levaba meses interrompido. Entre os acordos adoptados figura o encargo á empresa pública Tragsa para asumir os traballos pendentes e culminar unha infraestrutura chamada a reforzar a atención ás persoas maiores na comarca.
A decisión chega despois de que a empresa adxudicataria inicial, Jesús Naray Construcciones SL, entrase en concurso de acredores, unha situación que obrigou a deter os traballos cando o edificio se atopaba executado aproximadamente nun 70 %. A paralización atrasou a apertura dun servizo moi demandado pola veciñanza da Pontenova e dos municipios da contorna.
Xunto coa encomenda a Tragsa, a institución provincial aprobou a liquidación da obra e do convenio de colaboración subscrito co Concello da Pontenova, adaptando o marco administrativo á situación actual do proxecto. Ademais, iniciará unha reclamación por danos e prexuízos contra a empresa responsable do incumprimento contractual, co propósito de reclamar os custos derivados da paralización da actuación.
Segundo o estudo técnico e económico elaborado por Tragsa, será necesario un investimento de 2.032.800,44 euros para completar a residencia. Os traballos previstos inclúen a finalización integral do edificio, a reparación dos elementos deteriorados durante o tempo que permaneceu inacabado e a instalación dos equipamentos imprescindibles para a súa posta en funcionamento, como o sistema de chamada enfermeira-paciente, o ascensor para padiolas ou as instalacións de ventilación, calefacción e produción de auga quente sanitaria.
A Deputación explica que o orzamento foi actualizado para adaptarse ao incremento dos custos da construción rexistrado desde a redacción do proxecto inicial en 2019. Neste período, o aumento acumulado do Índice de Prezos ao Consumo condicionou o importe necesario para executar a fase final das obras.
Coa encomenda á empresa pública, a institución provincial confía en retomar os traballos con maior axilidade e garantir a súa execución con todas as garantías técnicas. O obxectivo é que a Pontenova poida contar o antes posible cun Centro de Atención a Maiores plenamente equipado e preparado para prestar servizo á veciñanza.