A comisión do San Xoán de Covas deixa a organización das festas tras anos de traballo
A comisión de festas de Covas, en Viveiro, renuncia á organización do San Xoán despois de varios anos encargándose dos festexos da parroquia. A decisión foi comunicada ao Concello e supón a saída do equipo formado por Paula Piñón, Patri Louzao, Chus Louzao e Julio Cociña.
A portavoz da comisión, Paula Piñón, foi quen trasladou inicialmente aos seus compañeiros a necesidade de facer un parón. "Necesito un descanso", explicoulles, unha decisión ante a que o resto dos integrantes comunicaron que, se ela deixaba a organización, eles tamén darían un paso atrás.
Desde a comisión lembran que levan desde 2013 organizando o San Xoán de Covas e consideran que chegou o momento de parar e deixar que outras persoas poidan asumir a responsabilidade de preparar os festexos.
A decisión, segundo explican, non responde a problemas coa parroquia. "Ímonos sen queixas, a parroquia é encantadora, pero estamos cansados", sinalan desde a organización, que agradece a experiencia vivida durante todos estes anos.
A saída da comisión de Covas prodúcese ademais nun momento no que outras organizacións festivas de Viveiro tamén comunicaron a súa decisión de non continuar. É o caso da comisión de O Naseiro, que deixou a organización ao finalizar a romaría, e de Xuventudes Chilindrinas, que anunciou estes días a súa saída das festas de Celeiro tras tres anos de traballo. Esta última decisión foi recollida tamén por A Mariña Xa na información sobre a saída da asociación da organización dos festexos.
As tres comisións trasladaron as súas respectivas decisións ao Concello de Viveiro, deixando agora aberto o relevo para que outras persoas ou grupos poidan asumir a organización das celebracións.