Xove reúne 50 persoas na súa primeira xornada dedicada á micoloxía
O Concello de Xove celebrou este sábado a primeira Xornada Micolóxica do municipio, unha proposta que contou coa participación de 50 persoas procedentes de diferentes puntos da Mariña e que estivo marcada pola aprendizaxe, a convivencia e o interese polo mundo dos cogomelos.
A programación comezou cunha sesión introdutoria no salón de actos, na que os asistentes recibiron as indicacións básicas para desenvolver a actividade antes de saír ao medio natural. Posteriormente, o grupo desprazouse ata a parroquia de Monte, onde realizou un percorrido polo campo para localizar e identificar distintas especies de cogomelos.
A xornada continuou despois do xantar cunha posta en común dos exemplares atopados. Este encontro permitiu examinar e comentar as especies recollidas, compartir coñecementos e aclarar as dúbidas que xurdiron durante a actividade.
Ademais de facilitar a aprendizaxe sobre a micoloxía, a iniciativa serviu para intercambiar experiencias entre persoas afeccionadas e descubrir a riqueza natural do municipio nun ambiente de compañeirismo.
Desde o Concello de Xove fan unha valoración positiva desta primeira edición, tanto pola asistencia como pola implicación e o interese amosados polos participantes.
A boa acollida da convocatoria anima o goberno local a continuar promovendo actividades deste tipo, orientadas a divulgar o coñecemento do medio natural e a favorecer a convivencia entre a veciñanza e as persoas afeccionadas á micoloxía.