Xove prepárase para vivir unha nova edición do San Antonio da Rigueira
O Concello de Xove presentou a nova edición da Festa de San Antonio da Rigueira, unha das citas máis emblemáticas do calendario festivo mariñán e unha celebración que, desde 2023, conta coa distinción de Festa de Interese Turístico de Galicia. A romaría volverá congregar o próximo 13 de xuño a centos de persoas arredor dunha tradición profundamente arraigada na historia e na identidade do municipio.
A presentación oficial do cartel contou coa participación do alcalde de Xove, Demetrio Salgueiro; da concelleira de Cultura, Dolores Meitín; da concelleira de Turismo e Medio Ambiente, Cecilia Duarte; e dos representantes da comisión organizadora José Antonio García Fernández e Juan José García Sánchez.
Desde o Concello destacaron a importancia desta celebración, considerada un dos grandes referentes culturais e festivos da comarca. A festa combina elementos relixiosos e populares nunha xornada na que a música, a gastronomía e o encontro social conviven cunha tradición transmitida de xeración en xeración.
A romaría do San Antonio Ventureiro da Rigueira foi durante décadas unha das celebracións máis coñecidas do norte de Galicia, chegando a converterse nun dos sinais de identidade máis recoñecibles de Xove. A súa popularidade atraeu historicamente visitantes procedentes de distintos puntos de Galicia e tamén de Asturias, consolidando unha afluencia que se mantén co paso dos anos.
Conscientes do valor patrimonial e social desta cita, as autoridades municipais impulsaron no ano 2009 un proceso de recuperación da romaría co obxectivo de devolverlle o protagonismo que tradicionalmente tivera nas diferentes parroquias do concello. Desde entón, a celebración foi reforzando a súa presenza ata converterse novamente nun dos acontecementos máis representativos do municipio.
O Concello anima tanto á veciñanza como aos visitantes a participar nesta nova edición e a gozar dunha xornada marcada polo ambiente festivo e pola convivencia. A organización confía en que as condicións meteorolóxicas acompañen para que a festa volva rexistrar unha ampla participación e reforce o seu papel como unha das grandes tradicións de Xove.