Xove converterá a súa Gala do Emprendemento Local nun 'Night Show' con Isabel Risco
A VIII Gala do Emprendemento Local de Xove chegará o vindeiro sábado 12 de decembro cun formato diferente ao das edicións anteriores. O Salón de Actos do Concello acollerá a partir das 20.30 horas un espectáculo presentado como un 'Night Show', no que se combinarán entrevistas, música en directo e humor para dar a coñecer experiencias empresariais desenvolvidas no municipio.
A actriz e humorista Isabel Risco será a encargada de conducir a velada, que contará coa participación musical de The 3DOTS, banda da Mariña. O alcalde de Xove, José Demetrio Salgueiro Rapa, será o responsable de abrir o acto.
O programa incluirá conversas con dous proxectos emprendedores da localidade. Un deles estará representado por Coral Pardo Ríos, de Coral Pardo Educación, mentres que o outro contará coa presenza de Hugo García Fernández e Saúl Vázquez Vega, vinculados á iniciativa Quenlla.
A través destas entrevistas, a gala pretende achegar ao público as traxectorias e experiencias que hai detrás de cada iniciativa, así como o traballo que implica poñer en marcha e manter un negocio ou proxecto profesional no ámbito local.
A cita busca tamén recoñecer a contribución das persoas emprendedoras á economía do municipio, coa creación de emprego e a fixación de poboación como elementos fundamentais para construír futuro desde o propio territorio.
A organización aposta nesta oitava edición por unha proposta aberta a todos os públicos, que combina o recoñecemento ao emprendemento coa diversión e o entretemento. A entrada será libre e a actividade desenvolverase no Salón de Actos do Concello de Xove.