Xove celebrará o 2 de abril a XXII edición da Festa do Polbo
A vila de Xove acollerá o vindeiro 2 de abril a XXII edición da Festa do Polbo, unha cita gastronómica organizada polos hostaleiros do municipio que volverá reunir veciñanza e visitantes arredor dun dos produtos máis apreciados da gastronomía galega.
A celebración comezará a partir das 13:00 horas e desenvolverase en diferentes establecementos hostaleiros da localidade, que ofrecerán racións de polbo ao prezo de 15 euros por cazola. O obxectivo da iniciativa é dinamizar a hostalaría local e crear un ambiente festivo que permita desfrutar da gastronomía e da convivencia durante toda a xornada.
Entre os locais participantes nesta edición atópanse Bar Pepe, Cafetería A Roda, Cociña, O Cabaliño, A Fuga, A Cívica, O Refugio e Cafetería Antoxo, que se suman a esta proposta gastronómica que cada ano atrae a numerosos asistentes.
A programación inclúe tamén animación musical ao longo da tarde. A partir das 19:00 horas, os establecementos participantes contarán coa actuación da Asociación Cultural Saiñas de Xove, así como coa percusión da comparsa Habelas Hainas, procedente de Barreiros, que contribuirán a animar o ambiente festivo nas rúas da localidade.
A Festa do Polbo está organizada polos hostaleiros de Xove e conta coa colaboración e patrocinio do Concello de Xove, que apoia esta iniciativa orientada a promover a actividade económica e social do municipio a través da gastronomía.