Xove acollerá a representación teatral 'Os contos de Dona Malva Rosa' o 20 de novembro

AMariñaXa
A obra de Ítaca Teatro representarase ás 19.00 horas no Centro Cívico dentro dunha iniciativa de sensibilización contra a violencia e a prol da igualdade
Dona-malva-rosa-xove-25n-2026
17 Nov 2026

A Asociación de Mulleres Bolboretas de Xove organiza o vindeiro 20 de novembro unha representación teatral no salón de actos do Centro Cívico, unha proposta cultural que busca promover a reflexión sobre a igualdade e a prevención da violencia. A función comezará ás 19.00 horas e estará aberta á participación da veciñanza.

A actividade terá como protagonista a obra 'Os contos de Dona Malva Rosa', creada e interpretada pola compañía Ítaca Teatro. Baixo o lema "Contos para espertar consciencias e construír respecto e igualdade", a representación empregará as artes escénicas como ferramenta para sensibilizar sobre a importancia de establecer relacións baseadas no respecto, a igualdade e libres de violencia.

A iniciativa chega a través da Asociación de Mulleres Empresarias de Lugo e conta coa colaboración e o patrocinio da Xunta de Galicia, no marco do Xacobeo 2027, do Ministerio de Igualdade e da Asociación para a Integración Laboral e Social da Muller.

Con esta convocatoria, Bolboretas mantén a súa aposta por incorporar propostas culturais e actividades compartidas á programación que desenvolve durante todo o ano. A entidade ofrece así unha nova oportunidade para achegarse ao teatro e participar na vida social e cultural de Xove.

A asociación, fundada en maio de 1990 na urbanización de Palmeiro, acumula máis de tres décadas de actividade no municipio. Ao longo da súa traxectoria promoveu numerosas iniciativas relacionadas co lecer, a formación, a saúde e a convivencia, ademais de propostas destinadas a reforzar os vínculos entre as socias e o conxunto da comunidade.

A representación de 'Os contos de Dona Malva Rosa' insírese nesa liña de traballo, coa que o colectivo busca manter unha programación activa e contribuír á dinamización cultural da localidade.

⇒PODES LER A ENTREVISTA Á ASOCIACIÓN MULLERES BOLBORETAS

0.15085101127625