Xove acollerá a exposición ‘Misión Afganistán’ con fotografías e material das Forzas Armadas
O Salón de Actos do Concello de Xove converterase durante dúas semanas nun espazo para achegarse á realidade de Afganistán e coñecer o traballo desenvolvido polas Forzas Armadas españolas durante a súa presenza no país. A exposición fotográfica ‘Misión Afganistán’ abrirá as súas portas o vindeiro luns 14 de setembro e poderá visitarse ata o día 27.
A inauguración terá lugar o propio luns ás 12.00 horas. A iniciativa está organizada pola Subdelegación de Defensa en Lugo coa colaboración do Concello de Xove e estará aberta ao público.
A mostra está composta por 30 fotografías, acompañadas de paneis informativos, uniformes e diverso material relacionado coa misión. A través destes elementos, os visitantes poderán coñecer diferentes aspectos da presenza das Forzas Armadas españolas en Afganistán entre 2001 e finais de 2014.
O percorrido aborda especialmente as tarefas realizadas en ámbitos como a asistencia sanitaria, a seguridade, a loxística, a vixilancia e a cooperación coa poboación afgá. A exposición busca tamén poñer en valor a importancia da paz e da seguridade e ofrecer unha aproximación ao traballo desenvolvido polos militares españois durante aqueles anos.
‘Misión Afganistán’ poderá visitarse todos os días, do 14 ao 27 de setembro, en horario de 9.00 a 14.00 e de 16.00 a 20.00 horas, no Salón de Actos do Concello de Xove. A entrada será libre.