Viveiro pon en marcha o servizo gratuíto para o control da gaivota patiamarela

AMariñaXa
O Concello de Viveiro pon en marcha, un ano máis, o servizo gratuíto para o control da poboación urbana da gaivota patiamarela e a pomba común para a campaña de nidificación deste ano.
16 abr 2024

O Concello de Viveiro pon en marcha, un ano máis, o servizo gratuíto para o control da poboación urbana da gaivota patiamarela e a pomba común para a campaña de nidificación deste ano. Viveiro foi un dos concellos pioneiros en prestar este servizo, que inicia en 2024 a súa cuarta campaña no municipio.

O obxectivo xeral que persegue é mellorar a calidade de vida da veciñanza, realizando unha correcta xestión da poboación destas aves para previr e evitar o crecemento desmesurado da mesma, provocando posibles pragas e problemas de salubridade pública, á vez que se asegura o benestar desta especie.

“Este servizo redunda no beneficio tanto da cidadanía como dos animais, garantindo o seu coidado. Esta cuarta campaña iníciase tras os éxitos das edicións anteriores, que avalan a satisfacción dos veciños coa iniciativa”, afirma María Loureiro, alcaldesa de Viveiro.

Na campaña de 2023, revisáronse 284 tellados e retiráronse os 210 niños localizados, 353 ovos e 42 polos. A proposta busca a redución e desprazamento da poboación de gaivotas que colonizou o medio urbano, facendo uso do mesmo para alimentarse dos refugallos xerados e colonizando os tellados para situar as súas zonas de cría.

Esta situación xera unha serie de problemas para a cidadanía, como ruídos, malos cheiros, danos nos tellados e mesmo ataques ao ser humano. Así mesmo, preténdese reducir a presencia da pomba común no concello de Viveiro, cunha poboacion estimada o comezo do servizo de 250 exemplares, durante o prazo de duración do servizo (2021-24).

Retirada dos niños en maio

Deste xeito, instalaranse gaiolas de captura en distintos puntos para a retirada directa de exemplares adultos, para o que se precisa da colaboración veciñal para a instalación temporal das mesmas. A partir do mes de maio comezarase coa retirada de niños de gaivota, finalizando o control dos tellados con problemas no mes de agosto, realizando un mínimo de dúas visitas a cada tellado afectado, para impedir o nacemento das postas.

As intervencións consistirán na visita á propiedade afectada por dous técnicos que procederán a realizar unha revisión ocular do tellado afectado e á retirada dos niños atopados e do seu contido (ovos, pitos). Posteriormente, realizarase o mesmo proceso cun mes de diferenza entre visitas. Dende o Concello de Viveiro, pídese a máximo colaboración tanto da veciñanza afectada como de quen detecte algún problema dos referidos.

Os resultados do servizo dependerán en gran medida da colaboración da cidadanía, favorecendo a mellora da calidade de vida no municipio e xestionando adecuadamente estas especies ca realización dun servizo de control poboacional baseado no benestar animal. As persoas que así o desexen poderán solicitar o servizo a través do número do Concello 982 562 968 ou contactando coa empresa a través do 689 838 359 ou do correo laruscontrol@hotmail.com