Viveiro mellorará espazos públicos e creará un parque canino cun obradoiro de emprego
O obradoiro dual de emprego Viveiro mantén permitirá acometer durante os próximos meses diferentes actuacións de acondicionamento de espazos públicos, melloras en varias escolas e a creación dun novo parque canino na Xunqueira. O programa, promovido polo Concello de Viveiro, conta cun investimento de 454.500 euros da Consellería de Emprego, Comercio e Emigración e prolongarase ata marzo do próximo ano.
A iniciativa ofrece 20 prazas, distribuídas entre dúas especialidades profesionais: xardinería e pintura industrial en construción. Durante nove meses, os participantes combinan un emprego remunerado coa formación teórica e práctica, co obxectivo de adquirir experiencia e mellorar as súas posibilidades de incorporación ao mercado laboral.
No apartado de xardinería, os traballos chegarán aos xardíns Noriega Varela e Lavandeiras, en Celeiro, así como á zona verde e deportiva de Lodeiro e á contorna da praza de Lugo. A estas intervencións sumarase a creación do parque destinado aos cans na Xunqueira.
A especialidade de pintura permitirá actuar tamén en diferentes inmobles municipais. Está previsto acondicionar os exteriores das escolas de Faro, Magazos, San Pedro e Xunqueira, mentres que nas de Calvoso e Vieiro os traballos se desenvolverán nos espazos interiores.
O delegado territorial de Lugo, Alfonso Villares, visitou algunhas das actuacións acompañado pola alcaldesa, Mariña Gueimunde. Villares destacou a dobre vertente destes programas, que permiten realizar melloras de interese municipal ao mesmo tempo que proporcionan formación e experiencia laboral ás persoas desempregadas.
Deste xeito, o obradoiro continuará ata marzo desenvolvendo intervencións repartidas por diferentes puntos de Viveiro mentres os seus participantes adquiren competencias profesionais en dúas especialidades con demanda laboral.