Viveiro contará con dúas novas pistas de pickleball no Espazo Xove
O Espazo Xove de Viveiro ampliarase cunha nova proposta deportiva: a creación de dúas pistas de pickleball, un deporte emerxente que mestura trazos do tenis, pádel, bádminton e tenis de mesa. A Consellería de Cultura, Lingua e Xuventude será a encargada de acometer esta actuación, cun orzamento estimado de 25.000 euros.
O delegado territorial da Xunta en Lugo, Javier Arias, explicou que o obxectivo é optimizar o uso da zona deportiva deste espazo xuvenil e ofrecer novas alternativas de lecer activo á veciñanza. As pistas adaptaranse ás medidas regulamentarias do pickleball, cunha lonxitude de algo máis de 13 metros e unha anchura de 6,10 metros nos partidos de dobres. Trátase dun deporte ideal para todas as idades, que se xoga con raquetas lixeiras e pelotas perforadas, e que ten experimentado un gran crecemento nos últimos anos.
O proxecto tamén tivo en conta a situación do recinto, situado entre o antigo convento de San Francisco e unha zona residencial. Neste sentido, Arias destacou que se evitarán impactos visuais sobre o patrimonio e molestias ao vecindario, escollendo unha modalidade que se adapta perfectamente ao contorno.
Unha vez rematadas as obras, a intención da Xunta é convidar ao alumnado dos centros educativos de Viveiro a descubrir este deporte, promovendo así hábitos saudables desde idades temperás e dando vida á infraestrutura.