Sociedade

A decisión afecta á festa infantil do pavillón Antonio Tarrío, ao tardeo con DJs na Praza Maior e á sesión de 'Viveiro Baila' polo accidente ferroviario de Toledo

O Concello de Viveiro cancelou as actividades de Samaín previstas para este sábado, 31 de outubro, así como a sesión de baile para persoas maiores incluída no programa 'Viveiro Baila', en sinal de respecto polas vítimas do accidente ferroviario acontecido en Toledo.

A suspensión afecta a tres propostas previstas para esa xornada. A festa infantil, que ía celebrarse no pavillón Antonio Tarrío con inchables e un túnel do terror, queda cancelada, ao igual que o tardeo con DJs programado na Praza Maior.

Tampouco se celebrará o baile dos maiores, que estaba previsto no salón de actos do Conservatorio de Música de Viveiro coa actuación do Dúo Caramelo.

O goberno local adoptou esta decisión como mostra de solidariedade coas persoas afectadas polo sinistro e coas súas familias. O Concello comunicará proximamente as novas datas nas que se celebrarán as actividades suspendidas.

Ademais, a Administración municipal agradeceu a comprensión da veciñanza e das persoas que tiñan previsto asistir aos eventos, e trasladou as súas condolencias ás familias das vítimas e o seu apoio ás persoas afectadas.