Viveiro acolle un campus de tecnificación en baloncesto para mozos de 10 a 17 anos
Viveiro converterase en abril nun punto de referencia para os amantes do baloncesto coa celebración do Campus de Tecnificación, unha iniciativa dirixida a mozos e mozas de entre 10 e 17 anos. O campus terá lugar os días 14, 15, 16 e 21 de abril e desenvolverase en diferentes instalacións da vila, como o Pavillón Municipal de Viveiro, o Pavillón do IES María Sarmiento e o Pavillón do IES Vilar Ponte.
O evento contará cun programa de monográficos especializados, centrados en diferentes aspectos do xogo. Comezando o 14 de abril con tiro e finalizacións, o 15 de abril con dribbling e pass and go, seguirá o 16 de abril con habilidades defensivas e rematará o 21 de abril con Do 1x1 ao 3x3.
A xornada desenvolverase en horario de 10:00 a 14:00 e inclúe formación específica, unha camiseta conmemorativa, seguro de responsabilidade civil e seguro de accidentes.
O prezo da actividade é de 20 euros por día solto, mentres que a matrícula para o campus completo é de 65 euros. Para os xogadores e xogadoras do C.B. Viveiro, ofrécese un prezo reducido de 60 euros.
A organización corre a cargo de Droce Eventos, en colaboración co Concello de Viveiro, a Xunta de Galicia, o club local de baloncesto e outras entidades deportivas. Para inscribirse, os interesados poden contactar a través do correo baloncesto@recordeventos.com ou dos teléfonos 648085737 e 651551481.