Viveiro acolle esta tarde a presentación de “Mulleres de Salitre”, unha homenaxe ás mulleres do mar da Mariña
A Feira do Libro de Viveiro contará este sábado 15 de agosto coa presentación de “Mulleres de Salitre. Na Mariña, o mar en feminino”, obra do mestre, investigador e divulgador cervense Paco Rivas.
O acto terá lugar ás 19.30 horas e servirá para dar a coñecer un traballo no que o autor rende homenaxe ás mulleres mariñeiras da Mariña lucense. O libro está editado polo Servizo de Publicacións da Vicepresidencia da Deputación de Lugo.
A obra constrúe o seu relato a partir de testemuños orais e documentación histórica para poñer en valor o papel desempeñado polas mulleres no ámbito marítimo e na vida da comarca.
Entre as protagonistas aparecen mariscadoras, percebeiras, redeiras, conserveiras, pescantinas e olgueiras, mulleres que contribuíron ao sostemento da economía, da vida comunitaria e do patrimonio cultural da Mariña lucense.