Viveiro abre as inscricións do Campamento Urbano de Verán con 120 prazas para favorecer a conciliación familiar
O Concello de Viveiro abrirá este martes, 2 de xuño, o prazo de inscrición para unha nova edición do Campamento Urbano de Verán, unha iniciativa enmarcada no Plan Corresponsables que busca ofrecer alternativas de lecer para a infancia durante as vacacións escolares ao tempo que facilita a conciliación das familias.
O programa está dirixido a nenos e nenas nados entre os anos 2014 e 2022 e desenvolverase entre o 6 de xullo e o 28 de agosto. Como novidade, as familias poderán optar por inscribir aos participantes durante todo o verán ou unicamente nas quendas quincenais, co obxectivo de adaptarse ás diferentes necesidades organizativas.
As actividades terán lugar no pavillón do CEIP Lois Tobío, de luns a venres, en horario de 8:30 a 14:30 horas. Ademais, habilitarase unha entrada flexible ata as 10:00 horas para ofrecer unha maior comodidade ás familias usuarias do servizo.
O campamento contará cun total de 120 prazas. No proceso de adxudicación terán prioridade aquelas unidades familiares nas que ambos proxenitores estean traballando. No caso de que a demanda supere a oferta dispoñible, realizarase un sorteo para determinar as admisións.
O prazo para presentar as solicitudes permanecerá aberto ata o 12 de xuño. As inscricións poderán formalizarse de maneira presencial a través do Rexistro Municipal ou mediante a sede electrónica do Concello.
Desde o Concello destacan que esta proposta combina actividades de lecer, convivencia e participación para os máis pequenos, ao tempo que ofrece unha ferramenta de apoio ás familias durante os meses de verán. A iniciativa forma parte das accións impulsadas para promover a corresponsabilidade e facilitar a conciliación da vida laboral e familiar no municipio.
