Vilaronte prepárase para celebrar tres días de festa arredor do San Xoán 2026
A parroquia de Vilaronte xa quenta motores para vivir unha nova edición das festas de San Xoán, unha celebración que volverá converter este núcleo de Foz nun punto de encontro para veciñanza e visitantes coincidindo coa chegada do verán. A programación deste 2026 estenderase ao longo de tres xornadas e incluirá actividades musicais, propostas gastronómicas e os tradicionais actos relixiosos.
O primeiro dos días festivos será o sábado 13 de xuño. A celebración arrancará ás 19.30 horas co pregón de Pablo Cid Gómez, coñecido como “O Moucho”. A continuación terá lugar a actuación da Asociación Cultural Saiñas de Xove e, xa pola noite, celebrarase unha gran churrascada popular que dará paso á música do Dúo Epok.
O ambiente festivo continuará o martes 23 de xuño coa tradicional verbena de San Xoán, unha das citas máis esperadas do calendario. A partir das 22.30 horas subirán ao escenario o grupo DKRIS e a orquestra Gran Parada, encargados de animar a noite máis máxica do ano.
As festas pecharanse o mércores 24 cunha xornada marcada polos actos relixiosos e a música. Ás 13.00 horas celebrarase a misa solemne cantada pola coral polifónica de Foz, seguida da procesión e dunha sesión vermú coa orquestra Principal. A formación musical tamén protagonizará o tardeo que servirá como broche final das celebracións.
Desde a organización destacan a importancia de manter viva unha festa que cada ano reúne a centos de persoas arredor da tradición, da convivencia e da cultura popular.