Cultura

Unha escultura de bronce lembrará ao escritor nos xardíns de Montero Ríos, que aspiran a converterse nun novo espazo de encontro para a poesía e a creación cultural

A figura de Carlos Oroza (Viveiro, 1923 – Vigo, 2015) contará cunha homenaxe permanente en Vigo coa instalación dunha escultura de bronce nos xardíns de Montero Ríos, un proxecto que busca recoñecer o legado dun dos poetas máis singulares da literatura contemporánea e crear un novo punto de referencia para a actividade cultural da cidade.

A iniciativa foi presentada pola delegada territorial da Xunta en Vigo, Ana Ortiz, e polo director xeral de Cultura, Anxo M. Lorenzo, nun acto celebrado no lugar onde se situará a obra. Ambos destacaron a traxectoria literaria de Oroza e a súa estreita vinculación con Vigo, cidade na que desenvolveu boa parte da súa vida e consolidou unha voz poética inconfundible.

A escultura será realizada polo artista Sergio Portela e fundida no obradoiro de Cuqui Piñeiro. Representará ao poeta a tamaño natural, cunha altura aproximada de 185 centímetros, e instalarase sobre unha base de granito galego.

O proxecto pretende ir máis alá da creación dun monumento conmemorativo. O obxectivo é transformar este espazo nun escenario estable para recitais poéticos, presentacións literarias e outras iniciativas vinculadas á cultura, mantendo viva a memoria e o espírito creativo de Carlos Oroza.

A Autoridade Portuaria de Vigo cederá o espazo para a instalación da escultura, mentres que a Xunta de Galicia e a Deputación de Pontevedra asumirán dous terzos do financiamento. O importe restante será achegado pola Asociación Cultural Évame Oroza mediante unha campaña de mecenado aberta á cidadanía, coa que se invita a colaborar na materialización desta homenaxe ao poeta viveirense.