Vegadeo volverá descubrir o seu patrimonio con novas visitas guiadas gratuítas
O Concello da Vegadeo volverá apostar este ano polas visitas guiadas “Descubrindo Vegadeo”, unha iniciativa que pretende dar a coñecer o patrimonio histórico, artístico e cultural do municipio a través de percorridos comentados por diferentes espazos de interese.
O programa desenvolverase en catro datas ao longo dos próximos meses, ofrecendo á veciñanza e ás persoas visitantes a oportunidade de descubrir a historia e as singularidades da vila desde unha perspectiva diferente. As visitas celebraranse os días 4, 13 e 20 de agosto, ademais dunha última convocatoria o 10 de outubro.
Todas as rutas partirán ás 17.30 horas desde o quiosco da música e estarán abertas ás persoas que desexen coñecer con maior detalle os elementos patrimoniais e culturais que forman parte da identidade de Vegadeo.
A participación será gratuíta, aínda que será necesario realizar inscrición previa chamando ao teléfono 609 711 481, co obxectivo de organizar os grupos e garantir o correcto desenvolvemento da actividade.
Esta proposta forma parte das accións impulsadas polo Concello para promover o coñecemento do patrimonio local e fomentar un turismo baseado na cultura e na posta en valor dos recursos propios do municipio. Ao mesmo tempo, pretende ofrecer unha actividade de lecer tanto para residentes como para visitantes durante os meses de maior afluencia turística.