Vegadeo organiza a ‘Escola de Monstros’ para nenos de 3 a 12 anos polo Samaín
O Concello de Vegadeo prepara unha nova edición da súa programación infantil de Halloween coa proposta ‘Escola de Monstros’, unha actividade temática dirixida a nenos e nenas de entre 3 e 12 anos. A iniciativa, enmarcada no programa Vegadeo Corresponsable, ofrecerá talleres vinculados á celebración e desenvolverase no colexio público Jovellanos.
As actividades están previstas para os días 30 de outubro e 3 e 4 de novembro, en horario de 9.30 a 14.30 horas. A proposta busca ofrecer unha alternativa de lecer para os máis pequenos arredor destas datas, cunha programación adaptada ás idades dos participantes.
As prazas son limitadas e asignaranse por orde de inscrición. As familias interesadas poderán presentar as solicitudes entre o 14 e o 23 de outubro, ata as 14.00 horas, a través da páxina web municipal, www.vegadeo.es, ou mediante o formulario de inscrición en liña.
A lista de nenos e nenas admitidos publicarase o 26 de outubro na web do Concello. No caso de que o número de solicitudes supere as prazas dispoñibles, terán prioridade os menores empadroados e/ou escolarizados en Vegadeo.
A actividade forma parte do programa Vegadeo Corresponsable e conta con financiamento do Goberno do Principado de Asturias, con cargo aos fondos recibidos do Ministerio de Igualdade, a través da Secretaría de Estado de Igualdade e contra a Violencia de Xénero, no marco do Plan Corresponsables.