Veciños de Figuerido reclaman medidas urxentes contra o tráfico pesado que invade o camiño cara ao Alto do Viso
A veciñanza de Figuerido, no concello de Cervo, volveu alzar a voz ante unha situación que cualifican de insostible. A través dun escrito presentado o 27 de agosto de 2025, lembran que xa no 17 de febreiro de 2023 advertiran do mesmo problema: o paso constante de vehículos pesados polo camiño de Figuerido ao Alto do Viso, unha vía municipal que, segundo denuncian, “convertérona nunha estrada de alto tráfico sen ningunha medida de protección para peóns”.
No documento remitido ao consistorio achegan máis de trinta fotografías e vídeos que, segundo aseguran, son “unha mostra do que ocorre a diario”. Relatan que camións de máis de 12 metros, incluso con mercadorías perigosas como gas licuado destinado á piscifactoría do Polígono Industrial de Cuíña, utilizan este trazado a pesar da prohibición para vehículos superiores a 5,5 toneladas. Engaden que tamén circulan camións de madeira, peixe, maquinaria ou froitas, e que algúns repiten o percorrido varias veces no mesmo día.
“É a única vía de esparexemento da zona, por onde paseaban maiores, ciclistas ou nenos, e agora é intransitable”, indican os asinantes. O problema vese agravado, explican, porque os navegadores GPS de móbiles e vehículos marcan esta ruta como acceso preferente a San Cibrao desde a N-642, o que multiplica o tráfico de caravanas, taxis e furgonetas de reparto.
Aseguran que as consecuencias xa son visibles: acumulación de lixo nos laterais, contaminación acústica que supera os niveis recomendables segundo a Axenda 2030, fendas nas paredes das vivendas situadas a menos de dous metros da vía e unha área de descanso no Alto do Viso “convertida nunha esterqueira”. “Ninguén levaría alí a pasear a un neno nin a descansar a unha persoa maior”, engaden.
Por todo isto, solicitan ao Concello que contacte coas empresas responsables dos navegadores GPS para retirar esta vía como primeira opción, que prohiba a circulación de camións de calquera tonelaxe, que limite a velocidade e que instale sinais de advertencia para os peóns. Ademais, reclaman a construción dunha vía específica de acceso ao polígono industrial e, mentres tanto, que se derive o tráfico por estradas de maior capacidade.
“Estamos fartos e non imos quedar calados. O que antes era un lugar tranquilo estase a converter nun perigo diario”, conclúe a veciñanza, que asegura que seguirá vixiante ata que haxa unha solución real.