Unha nova escavación no castro de Zoñán busca ampliar o coñecemento sobre o xacemento
O castro de Zoñán, en Mondoñedo, é obxecto dunha nova campaña de investigación arqueolóxica coa que se pretende ampliar a superficie escavada e obter máis información sobre este poboado fortificado da Idade do Ferro. A Consellería de Cultura, Lingua e Xuventude destina 20.000 euros á actuación, desenvolvida a través dun convenio co Concello mindoniense.
Os traballos de campo comezaron este luns e prolongaranse durante 20 días. Unha das principais intervencións será a escavación duns 40 metros cadrados situados na contorna da zona xa descuberta, o que permitirá avanzar na localización e definición de novas estruturas.
O delegado territorial do Goberno autonómico en Lugo, Alfonso Villares, visitou o xacemento para coñecer a evolución da campaña. Durante o percorrido destacou que "sacar á luz e definir novas estruturas amplía e enriquece a perspectiva sobre o xacemento".
A intervención non se limitará á apertura de novas áreas. O proxecto contempla tamén labores de protección das construcións recuperadas, así como tarefas de roza e limpeza do recinto, traballos de topografía e planimetría e un estudo detallado dos materiais arqueolóxicos mobles que se recuperen durante a campaña.
Esta actuación intégrase no programa promovido pola Dirección Xeral de Patrimonio Cultural durante 2026 para avanzar no coñecemento, conservación e posta en valor do patrimonio arqueolóxico galego. Na provincia de Lugo están previstos 11 proxectos cun orzamento inicial conxunto de 203.400 euros.
O castro de Zoñán está situado nun esporón desde o que se domina o val do río Cesuras, na parroquia da Nosa Señora dos Remedios. Trátase dun poboado fortificado da Idade do Ferro formado por unha única croa, cunha superficie total aproximada de 7,8 hectáreas.
O xacemento conta ademais cunha longa historia de investigación. Foi un dos primeiros castros escavados en Galicia, con intervencións xa no ano 1867, e na actualidade permanecen exhumadas estruturas habitacionais que ocupan aproximadamente 900 metros cadrados.
A nova campaña permitirá continuar afondando nun enclave que forma parte tamén da oferta cultural e patrimonial de Mondoñedo. O castro está integrado nos roteiros culturais municipais e pode visitarse de maneira libre e gratuíta, cun percorrido complementado por paneis explicativos sobre o xacemento.