Sociedade

Ata o momento non consta ningún dano persoal nin material asociado a este episodio sísmico

Un pequeno movemento sísmico foi detectado na madrugada deste luns no mar Cantábrico, fronte á costa da Estaca de Bares, no concello coruñés de Mañón.

Segundo os datos facilitados polo Instituto Xeográfico Nacional (IGN), o tremor produciuse ás 4.40 horas e alcanzou unha magnitude de 2 graos na escala Richter.

O epicentro localizouse no mar e o sismo rexistrouse a unha profundidade de nove quilómetros. Trátase dun movemento de escasa intensidade que, de acordo cos criterios habituais, non adoita ser percibido pola poboación, xa que os terremotos inferiores a magnitude 2 son imperceptibles e os situados entre 2 e 3 raramente chegan a notarse.

Ata o momento non consta ningún dano persoal nin material asociado a este episodio sísmico.