Formalizado o contrato para o sendeiro peonil que unirá as praias de Peizás e A Pampillosa
![recuperación e conservación da praia da Pampillosa Foz novembro 2022 2](https://amarinaxa.com/wp-content/uploads/2022/11/recuperacion-e-conservacion-da-praia-da-Pampillosa-Foz-novembro-2022-2.jpg)
A subdelegada do Goberno, Isabel Rodríguez, destacou o compromiso do Ministerio para a Transición Ecolóxica e o Reto Demográfico para poñer en valor os recursos naturais do Concello de Foz, dentro da súa aposta pola dinamización económica e turística da Mariña.
Isabel Rodríguez avanzou que o Goberno reforza o seu apoio á comarca lucense co impulso ao proxecto de obtención de espazos para uso público e execución do sendeiro peonil entre as praias de Peizás e A Pampillosa, en Foz, cun investimento total de 886.500 euros. A subdelegada informou de que o Servizo Provincial de Costas vén de formalizar o contrato, adxudicado á peme ELAYCO. SL, que ten por obxecto favorecer o disfrute de novas franxas da costa mariñán.
“Estes novos traballos favorecerán o mellor aproveitamento dos valiosos recursos naturais cos que contamos na Mariña, para que poidan ser desfrutados con maior comodidade tanto polos veciños e veciñas de Foz como polos turistas, sempre mantendo un absoluto respecto polo medio ambiente”, manifestou Isabel Rodríguez quen defendeu que “demostramos con feitos a aposta do Goberno pola conservación e mellora da costa da Mariña”.
As actuacións financiadas polo Ministerio para a Transición Ecolóxica consistirán na creación dun sendeiro peonil entre as dúas praias nuns terreos que xa foran expropiados con este fin. Cunha lonxitude de 1.600 metros, o novo camiño permitirá o peche definitivo do paseo xa existente pola costa, entre a praia dos Fondás, na ría de Foz, e o interior da ría do Ouro.
Este proxecto súmase a outras ambiciosas iniciativas nas que está a traballar o mesmo departamento no Concello de Foz, así pois a subdelegada informou que nos vindeiros días adxudicarase o proxecto para realizar diversas melloras na praia de Llás. Ademais, lembrou a recuperación do sistema dunar da praia da Pampillosa, na parroquia de Fazouro, cun orzamento de máis de 80.000 euros por parte do Goberno.
![recuperación e conservación da praia da Pampillosa Foz novembro 2022 1](https://amarinaxa.com/wp-content/uploads/thumbs/2022/11/recuperacion-e-conservacion-da-praia-da-Pampillosa-Foz-novembro-2022-1-200x104.jpg)