Último día para anotarse na viaxe de Trabada a Portugal con visitas a Oporto, Aveiro e o Bom Jesus
Este 15 de outubro é o último día para anotarse na viaxe a Portugal organizada polo Concello de Trabada dentro do programa "Viaxa co Concello de Trabada". A escapada desenvolverase do 6 ao 8 de novembro e terá como principais destinos Oporto, Aveiro e o Bom Jesus do Monte.
As persoas interesadas deberán formalizar a inscrición e efectuar o pagamento presencialmente nas oficinas municipais antes de que remate o prazo. As prazas son limitadas e están destinadas inicialmente ás persoas empadroadas no Concello de Trabada. No caso de quedar vacantes, poderán participar tamén persoas con familiares empadroados no municipio.
A viaxe partirá o venres 6 de novembro ás 7.00 horas desde a Praza do Concello de Trabada e prolongarase durante tres días, combinando visitas turísticas con momentos de convivencia entre os participantes.
O prezo é de 280 euros por persoa e inclúe o transporte en autobús e o seguro de viaxe, dúas noites en habitación dobre nun hotel de catro estrelas, as entradas ás actividades previstas e a manutención recollida no programa.
En concreto, están incluídos os almorzos tipo bufet do sábado e do domingo, as comidas e ceas do venres e do sábado e a comida do domingo.
O alcalde de Trabada, Rubén García Freije, destacou a boa acollida que está a ter esta iniciativa desde a súa posta en marcha. Segundo explicou, o obxectivo é ofrecer á veciñanza oportunidades para "coñecer novos destinos, pero tamén compartir tempo, relacionarse e desfrutar de experiencias en compañía".
O programa presta unha atención especial ás persoas maiores. O rexedor sinalou que moitos veciños e veciñas non tiveron anteriormente a oportunidade de coñecer determinados lugares debido ás súas circunstancias persoais ou laborais. Por iso, apuntou, estas saídas buscan facilitarlles agora esa posibilidade e, ao mesmo tempo, crear novos espazos de encontro.
Co peche das inscricións este 15 de outubro, o Concello encara xa a recta final dos preparativos dunha nova edición de "Viaxa co Concello de Trabada", que nesta ocasión cruzará a fronteira portuguesa cun itinerario por algúns dos seus destinos máis coñecidos.