Trabada viaxará a Portugal en novembro cunha ruta por Oporto, Aveiro e o Bom Jesus do Monte
O programa "Viaxa co Concello de Trabada" terá Portugal como próximo destino. O Concello prepara para os días 6, 7 e 8 de novembro unha nova saída que permitirá ás persoas participantes coñecer Oporto, Aveiro e o Bom Jesus do Monte, dando continuidade a unha iniciativa que busca combinar turismo, convivencia e novas experiencias fóra do municipio.
A expedición partirá o venres 6 de novembro ás 7.00 horas desde a Praza do Concello de Trabada. A proposta prolongarase durante tres días e inclúe diferentes visitas e actividades nos destinos previstos no itinerario.
Desde o goberno local destacan a boa resposta conseguida polas viaxes organizadas anteriormente. O alcalde, Rubén García Freije, sinala que o programa "está a ter unha resposta moi positiva desde que organizamos a primeira viaxe" e incide en que a finalidade non se limita a coñecer novos lugares. "Para nós é importante ofrecer actividades que permitan á veciñanza coñecer novos destinos, pero tamén compartir tempo, relacionarse e desfrutar de experiencias en compañía", explica.
O Concello presta unha atención especial ás persoas maiores, ás que pretende facilitar alternativas de lecer e convivencia. García Freije lembra que moitos veciños e veciñas non puideron viaxar no seu momento debido ás circunstancias laborais ou persoais. "Con estas viaxes queremos facilitar que agora poidan facelo, ao tempo que favorecemos a convivencia e creamos novos espazos de encontro entre a veciñanza", apunta.
O prezo da viaxe será de 280 euros por persoa e inclúe o desprazamento en autobús e o seguro, así como dúas noites en habitación dobre nun hotel de catro estrelas. Tamén estarán incluídas as entradas correspondentes ás actividades programadas e a manutención contemplada no itinerario.
En concreto, o paquete incorpora os almorzos tipo bufet do sábado e do domingo, ademais da comida e a cea do venres e do sábado e a comida do domingo.
O prazo de inscrición abrirá este martes 22 de setembro ás 9.00 horas e permanecerá dispoñible ata o 15 de outubro. Tanto a formalización da reserva como o pagamento deberán realizarse presencialmente nas oficinas municipais.
As prazas son limitadas e, nun primeiro momento, estarán reservadas para persoas empadroadas en Trabada. Se unha vez finalizado o prazo quedasen vacantes, poderán acceder tamén persoas que teñan familiares empadroados no municipio.
Con esta nova escapada a Portugal, o Concello dá continuidade a unha iniciativa coa que pretende achegar novas posibilidades de ocio á poboación e, ao mesmo tempo, favorecer as relacións sociais e a convivencia entre a veciñanza, especialmente entre as persoas de maior idade.