Trabada recupera os seus campamentos de verán e xuvenil con novas actividades para a mocidade
O Concello de Trabada volve poñer en marcha este verán os seus campamentos municipais, unha iniciativa dirixida tanto á infancia como á mocidade que busca ofrecer alternativas de ocio educativo durante os meses estivais e, ao mesmo tempo, facilitar a conciliación das familias.
O prazo de inscrición abrirase mañá, 12 de maio, e permanecerá activo ata o 5 de xuño. As actividades desenvolveranse entre xullo e agosto, de luns a venres en horario de 10.00 a 14.00 horas, nas instalacións municipais do concello.
A oferta divídese en dúas propostas diferenciadas. Por unha banda, o Campamento de Verán está dirixido a nenos e nenas nados entre o 1 de xaneiro de 2014 e o 31 de decembro de 2022, mentres que o Campamento Xuvenil está pensado para mozos e mozas nados entre o 1 de xaneiro de 2008 e o 31 de decembro de 2013.
Ambas iniciativas regresan tras a boa acollida de edicións anteriores, especialmente no caso do campamento xuvenil, que volve despois do éxito acadado na súa primeira convocatoria. O programa busca consolidarse como unha das propostas máis destacadas da programación estival local.
Desde o goberno municipal, o alcalde, Rubén García Freije, subliña a importancia de manter este tipo de actividades, destacando que “é fundamental seguir ofrecendo propostas para a infancia e a mocidade, ao tempo que se apoia ás familias na organización do verán”.