Trabada quentará motores coa II Concentración Moteira organizada polo Motoclube A Cadeira
Trabada volverá converterse nun dos epicentros do motociclismo da comarca coa celebración da II Concentración Moteira, unha proposta impulsada polo Motoclube A Cadeira que reunirá durante tres días a afeccionados ás dúas rodas procedentes de distintos puntos de Galicia e doutras comunidades.
A programación arrancará o venres 19 de xuño coa apertura das inscricións e a recepción dos participantes. A xornada incluirá a tradicional subida ao Monolito da Cadeira, que este ano incorporará novidades, e rematará cunha longa noite de música e festa protagonizada por varias actuacións en directo.
O sábado concentrará boa parte das actividades previstas. Ademais da sesión vermú e dunha comida para os inscritos, os asistentes poderán poñerse a proba en simuladores de pilotaxe inspirados no Mundial de Motociclismo e participar nunha tarde de convivencia arredor do motor. Un dos momentos máis agardados será a exhibición de STUNT3SHOW, protagonizada pola primeira muller española especializada nesta disciplina, que actuará por primeira vez en Galicia.
A programación continuará cunha cea popular na carpa instalada na explanada e unha nova verbena nocturna con diferentes actuacións musicais. Xa entrada a madrugada celebrarase unha homenaxe aos motoristas falecidos, un dos actos máis emotivos da concentración.
O domingo estará dedicado a actividades máis relaxadas e ao descubrimento da contorna. Tras o almorzo colectivo, os participantes realizarán unha ruta turística libre con parada para degustar un petisco. Posteriormente terá lugar unha sesión vermú acompañada de sorteos e da entrega de premios, antes da comida de clausura que porá o punto final ao encontro.
Desde o Motoclube A Cadeira destacan que o obxectivo desta segunda edición é consolidar a concentración como unha referencia para os amantes das motos, promovendo ao mesmo tempo a convivencia, o compañeirismo e a dinamización do municipio. A organización agarda unha importante afluencia de participantes nun evento que combina espectáculo, lecer e paixón polo motociclismo.