Trabada pon en marcha os campamentos de verán para infancia e mocidade
O Concello de Trabada deu comezo hoxe, 1 de xullo, a unha nova edición dos seus campamentos de verán, unha iniciativa dirixida tanto á infancia como á mocidade que se desenvolverá ao longo dos meses de xullo e agosto nas instalacións municipais.
Estas actividades realizaranse de luns a venres, en horario de 10.00 a 14.00 horas, ofrecendo ás familias do municipio unha alternativa de lecer educativo que combina aprendizaxe, xogo e convivencia durante o período estival.
O programa está estruturado en dúas modalidades. Por unha banda, o Campamento de Verán está destinado a nenos e nenas nados entre o 1 de xaneiro de 2014 e o 31 de decembro de 2022. Por outra, o Campamento Xuvenil está dirixido á rapazada nacida entre o 1 de xaneiro de 2008 e o 31 de decembro de 2013, adaptando as actividades ás distintas idades e necesidades dos participantes.
O alcalde de Trabada, Rubén García, destacou a importancia destes programas como ferramenta clave para favorecer a conciliación da vida laboral e familiar durante o verán, ao tempo que se ofrecen propostas educativas, deportivas e de ocio pensadas para cada etapa de desenvolvemento.
O rexedor subliñou tamén que o Concello mantén unha aposta continuada por este tipo de iniciativas ao longo de todo o ano, co obxectivo de dar resposta ás necesidades das familias e contribuír ao seu benestar diario.
Con esta nova edición, o Concello de Trabada reforza o seu compromiso coa creación de espazos seguros e enriquecedores para a infancia e a mocidade, promovendo ao mesmo tempo a convivencia e o desfrute do tempo libre no municipio.